يارب

تمُر الحياة 

.أقف وحيدةً على شاطىء البحر وقت الغروب

!هل سيُشرق علىّ فجر يوم جديد؟

أم هل سيظَلُ قلبى دوماً وحيد؟

!أسيظَلُ يتخبط بين الدروب؟

.....

. سأظل أأمل .. وأأمل ..وأأمل ...حتى يأتينى يومٌ سعيد

كاذبون

فكرة حملة "عسكر كاذبون" ببساطة هى نشر انتهاكات المجلس العسكرى على المصريين فى كل مكان. إعلام شعبى بديل عن ماسبيرو لتوصيل صوتنا للشارع. بنحاول نوصلهم الصورة كاملة ونسيبهم هما يقرروا ينضموا لمين؟ يصدقوا مين؟ ويهاجموا مين؟

     :نشر الانتهاكات بيكون عن طريق الصور والفيديوهات.   ممكن تطبع الصور على ورق وتوزعها ..  ولو عندك سمارت فون يبقى ممكن تنزل الفيديوهات والصور عليه وتكون معاك فى كل مكان. كلم الناس فى كل حته  .. فى الشارع .. فى الشغل .. فى المواصلات .. فى أى مكان تقدر تعرض فيه الفيديوهات دى على الناس. لو حتى هتوصل الحقيقة لفرد واحد بس بردو هتكون ساعدت الثورة.:

الطريقة التانية هى الداتا شو: والارشادات ليها هتلاقوها فى موقع مٌصٍرّين وهى:-

*  هتكون محتاج لابتوب، بروجيكتور، سماعات، مصدر كهرباء، وشاشة عرض >> ممكن قطعة قماش بيضاء وتتلزق على الحيطة .. أو لوحة اعلانات من اللى فى الشارع لو كان الاعلان لونه فاتح ومفيهوش تفاصيل كتير

* اختار مكان يكون بيمر عليه عدد كويس من الناس ..ويفضل إن تنظيم العرض يكون فى منطقة سكنك أو دراستك ويكون معاك صحابك أو جيرانك وعدد لا يقل عن 30 شخص علشان أكيد هيكون حواليك مخبرين و'مواطنين شرفاء' وممكن تتعرضوا لمضايقات من أى منهم..

* هتقسموا نفسكوا جزء هيمسك بوسترز معروض فيها انتهاكات المجلس العسكرى وده لجذب انتباه الناس لمكان العرض .. وجزء هيوزع فلايرز على الناس اللى ماشية فى الشارع  .. واتنين أو تلاته بيراقبوا المحيط العام لمكان العرض .. والجزء الأخير بيتابع
العرض مع الناس علشان لو حد منهم كان ليه أى استفسار أو أسئلة.

* يفضل لو تحط الفيديوهات والصور وأسامى المواقع اللى تفيدهم ومنشور فيها الانتهاكات دى على سيديهات وتعمل منها كذا نسخة معاك علشان توزعها على الناس (لو النسخ كتير) أو  تديهالهم لو حد طلب (فى حالة مقدرتش تعمل نسخ كتير) .. لأن كل واحد بتديهاله
بيتحول لمنبر تانى ينشر الحقايق دى فى المحيط بتاعه وبكده تكون بتنشر انتهاكات العسكر على نطاق أوسع .. وده الهدف..
.وممكن لو تقدروا توزعوا السيديهات دى قدام المسجد بعد صلاة الجمعة

* يفضل لو تروح قبل معاد العرض بفترة كافية للتحضير 

* النوت دى : فيها نصايح مهمة جدا وكويسة جدا وياريت تقروها .. هيا مكتوبة أصلا للحملة فى المترو بس من أول النقطة رقم 5 فى نصايح مفيدة .

وانت بتتكلم مع الناس اصبر عليهم وكلمهم بهدوء، محدش بيتحول من كنبة لثورى فجأة كده ، ركز على فكرة إن أى انسان هيرفض انتهاكات المجلس العسكرى بغض النظر سواء كان مع الثورة أو ضدها.. احنا شعبنا بيخاف من المجهول وبيحب يمشى جنب الحيط، ودى نقطة لازم تراعيها وإنت بتتكلم معاهم. حاول تفهمه وتطمنه من المستقبل، وفهمه إن دلوقتى حتى اللى بيمشى جنب الحيط مش بيسلم .. وإن أمانهم الوحيد هو معاقبة ومحاسبة القتلة وكل مذنب أجرم فى حق الشعب المصرى وتحقيق العدل وسيادة واستقلال القضاء. وإن ده مش هيحصل طول ما المجلس العسكرى هو اللى حاكم. وإن مفيش ولا ظابط من اللى قتل أو أصاب أى بنى آدم من 25 يناير حصلة حاجه ولا أخد حكم، بالعكس .. بيطلعوا براءة أو بيترقوا فى مناصبهم >> الكومى - ظباط السيدة زينب - ظباط السويس

وصل للناس وفهمهم إن المجلس العسكرى كده كده ماشى .. ولما يمشى مش هيهاجر بره البلد ده بس هيرجع لثكناته. وفكرهم إن بردو كان بيتقال علينا بلطجية ومثيرى شغب وعملاء فى يناير وكله نزل الشارع يرقص ويحتفل فى 11فبراير وبقينا "الشباب الطاهر بتاع 25 يناير"

هدفك الأساسى مش إنك  تخلى الناس تنزل معاك التحرير ويبقوا ثوريين .. هدفك الأساسى إنك تظهر الحقيقة .. تثبت إن المجلس العسكرى كذاب .. تثبت إن ماسبيرو كذاب ... تثبت إن اللى فى التحرير مش بلطجية وبنات مش كويسة.، 

هدفك الأساسى إنك تورى للناس الحقيقة كاملة وتسيبهم يفكروا فيها .. هدفك إنك توصلهم إن اللى فى التحرير دول ولادهم وإخواتهم مش كائنات فضائية.

هدفك الأساسى مش إنك تخليهم يفكروا زيك بالظبط ولا إنك تفرض رأيك عليهم.. هدفك إنك توصل فكرتك وتسيبهم يقيموها .. تنشر
ثوريتك وتخليهم يتشربوها .. .تصدمهم بالواقع بس بهدوء .. وسيب الصور والفيديوهات هيا اللى تتكلم .. ليها مفعول السحر

لو البلد فيها بلطجية دى مسئولية الدولة مش الثوار
لو البلد فيها أيادى خفية دى مسئولية الدولة مش الثوار
لو البلد فيها عملاء من الخارج دى مسئولية الدولة مش الثوار

بدل ما الجهات الأمنية اللى فى البلد كلها شغالة علينا قتل وضرب وسحل اختطاف وكشوف عذرية واعتقال ومحاكمات عسكرية .. يروحوا يشوفوا شغلهم ويقبضوا على كل الأطراف التالته اللى عمالين يتهموهم فى كل مصيبة.

: إزاى تستخدم ميديا "عسكر كاذبون" حتى لو مش بتنظم عرض فى الشارع

اقعد على القهوة بلابتوب وفرج الناس*
تبعتها لزمايلك أو أصحابك بلوتوث*
تبعتها بالايميل لكل الناس اللى عندك*
تفرجها لأهلك*
تحطها على سيديهات وتوزعها على الناس*


-------------------------------------------------------------------
: الفيديوهات


.ممكن تلاقى فى اللينك دى الفيديوهات اللى هتحتاجة بصيغة مناسبة للكمبيوتر*

. ممكن تلاقى هنا  .. أو هنا .. فيديوهات بصيغة  تحميل للموبايل وممكن تحولها لصيغة مناسبة للكمبيوتر عن طريق  البرنامج ده*

وفى فيديوهات أكتر موجودة على قناة "عسكر كاذبون" على اليوتيوب .. وممكن تنزلها على جهازك باستخدام  البرنامج ده*

-----------------------------------------------
: الصور


 ممكن تلاقيها فى المواقع دى

http://lessan7al.wordpress.com/2011/12/18/scaf-egyarmy-crimes/

http://www.scaf-crimes.blogspot.com/

 وده تصميم جرافيتى  " كاذبون" .. كل ما عليك هو طباعة التصميم ولصقة على ورق مقوى وتفريغ اللون الأسود ، وبعد كده رشة فى منطقتك


وده "جرافيتى التلميذ" .. كتيب يحتوى على بعض رسومات الجرافيتى


وده فيديو لشرح كيفية رسم استنسل جرافيتى فى الشارع

 وده سى دى "كاذبون" .. جاهز للحرق والتوزيع  .. يحتوى على أحداث ماسبيرو / محمد محمود / مجلس الوزراء

!!!!أليس من بينكم رجل رشيد ؟؟

 دلوقتى بقى احنا بيضحك علينا علشان سايبين بين صفوفنا فراغات ، كل يبكى على ليلاه .. ولو احنا عاوزين بجد مطالبنا تتحقق ونخلى مصر دى حلوة الحلوات بجد .. يبقى لازم .. لاااااااااااازم نوحد الصف ونسد الفراغات دى .. لازم ننسى كلمة أنا ونفتكر كلمة احنا .. حتى ننسى احنا دى كمان .. ونفتكر بس : <<مصر>> ... ساعتها .. وساعتها بس هيحصل اللى احنا عاوزينه وأكتر.

الثوار فى ميدان التحرير وباقى الميادين فى معظم محافظات مصر معتصمين .. ولكل معتصم مطلب. في مطالب  توافقيه لا يختلف عليها ثائر من حزب كنبه .. منها دم الشهداء ، واستقلال القضاء ، تطهير جهاز الشرطة ، حل المجالس المحلية، وقف المحاكمات العسكرية، تطهير الإعلام، ومحاكمة رموز الفساد من النظام السابق ... والحالى ! .. وفى مطالب فردية أو جماعية لكن غير توافقية. ذكائنا فى إننا نحدد أولوياتنا .. إننا نعرف نطلب ايه دلوقتى ونطلب ايه بعدين .. إننا نعرف بنطلب من مين ونعرف هو بيشوف مطالبنا دى ازاى، نعرف انهى مطالب هيا اللى هتحقق رضا قاعدة كبيرة من الشعب .. وتخليه راضى عن الثورة دى ومؤيدها .. بدل ما تخليه ناقم عليها وبيهاجمها... إننا نحط خطة وخطة بديلة .. خطوات تصاعديه للتصعيد .. وليست تلقائية .. لأن الخطوة اللى بناخدها بيبقى صعب نرجع فيها .. فلازم نفكر فيها كويس جدا.

وعلشان نكسب تعاطف وتأييد الأغلبيه الصامته دى لازم نشوف هما شايفين ايه.

ليه نسيب نفسنا 100 صوت يتكلم فى نفس واحد ويقول نفس الكلام ويرد على نفسه بنفس الردود ؟؟!!! .. لا احنا هنسمع بعض ولا حد هيسمعنا .. وفى الآخر اللى هيبان ويتصدر ل – غير الثائرين – هو مجرد دوشة على الفاضى .. دوشة غير مفهومة بتجيب صداع. طيب ليه ؟؟!!!!

ليه الحركات السياسة والأحزاب ميعدوش مع بعض - فى التحرير علناً قدام كل المعتصمين - و يختاروا منهم أو من غيرهم وبرأى الأغلبيه شخص عاقل رشيد .. يتكلم باسم مطالب الثورة ..... أليس من بينكم رجل رشيد ؟؟!!!!

الشخص دا هيكون مسئوليته يلف فى الميدان .. ويعد مع المعتصمين .. يشوف المطالب – اللى المفروض سكان زحل عارفينها أصلا – ويكون ملوش الحق لترشيح نفسه لا فى الانتخابات البرلمانية ولا الرئاسية ؛ وتكون الغالبية متوحدة وراه .. ونطلب مطلب مطلب ونصر ونلح ونرفس حتى فى الأرض لحد ما يتحقق، وبعدين ننقل على المطلب اللى بعده. صعبة دى ؟!

نمشى على التوالى وببطء وتتحقق مطالبنا - إن شاء الله - أحسن ما نمشى بالتوازى .. بالتوازى بنتشتت وهما بيتوهونا ويشغلونا بصغائر الأمور: مبارك قلبه وقف .. لا أصل مبارج حالته النفسية زفت .. ايه ده ؟! ده مبارك فى الغيبوبه – على اعتبار إنه كان فايق قبل كده .. مابقاله أكتر من 10 سنين فى الغيبوبة – و لا لا لا .. أصل مبارك فى السعودية أصلا ... لا ياشيخ ؟؟ فاضيين احنا نتشغل بمبارك وصبغة مبارك ومرات مبارك .. وابن عم بنت خال جوز مبارك !!!

أينعم صعب إننا نوحد دماغ أكتر من حد باتجاهات مختلفه على حاجه واحده ، بس لو كلنا عطشانين ، .كلنا بنجرى على الميه .. مبقولش اللى جنبى ده مش عاجبنى أو هيا الميه دى مغسولة ؟! .. ولا "هاتله قزازة بيره ساقعة من الفريجيدير ياقرنى" ... ميه يبقى هنشرب .. وهو عطشان وأنا عطشان ... كلنا عطشانين ... فى الحرم المكى كلنا بنبص للكعبه : زنجى / أصفر /  أبيض / أحمر .. مبيهمناش .. وفى الكنيسة الكل بيسمع للقسيس .. غنى / فقير / متعلم / جاهل ... مبتفرقش ..وحده الهدف هى اللى بتجمعنا .. مش اتفاقنا فى الفكر، اللون، اللغه، ولا الثقافة.

لازم كل واحد يحاول يبطل يبص حواليه وبس .. نحاول نسمو شوية علشان نشوف الصورة مكتملة .. وعلشان مصر لازم كل واحد ييجى على نفسه شوية .. شويتين .. شويات .. علشان تبقى زى ما بنتمناها .. ساعتها بقى ممكن نلف حوالينا وناخد بالنا من إن الميه سخنه .. لأ أصلها مش ميه معدنية .. ولا لاتبقى المصيبة الكبرى وتطلع ميه مبلوله أساسا.

الريسة

خلاااااااااااااص .. أنا قررت إنى هرشح نفسى للرئاسة بعد الجرعة السياسية المكثفة اللى أخدتها دى

مش رئاسة 2011 لأنى طبعا لسه مش مستعده .. و بعدين لازم أجرب فى رئيس غيرى علشان لو طلع الموضوع مش كده كده يعنى أبقى ألف و أرجع تانى :))

ثورة 25 يناير

صديقتى

لم أكن لأظن بأى حال من الأحوال أن أجدها بعد كل تلك الأعوام
بحثت عنها كثيراً و بشتى الطرق منذ فرقتنا الأيام بعد الثانوية العامة و كلما طرقت طريقا أجده مسدوداً
عندما حاولت الاتصال برقم تليفونها أخبرتني عاملة التليفون أن هذا الرقم غير موجود بالخدم
و عندما حاولت إرسال رسالة إلكترونية أجابني الأستاذ ياهوو بأنه لم يتم العثور على هذا البريد الالكترونى
ذهبت للبحث فى دليل التليفون فلم أجد ما يشير إليها من قريب أو بعيد

ظلت ذكرى فى مخيلتى تغرق فى دوامة حياتى فأنساها ثم تطفو على السطع فتعود إلى ذكراها و أظل أبحث أبحث ..... أبحث عنها ، و حين لا أجدها أفقد الأمل مرة أخرى و تعود ثانية للغرق فى دوامة الحياة
هى صديقتى ، و كنا أربعة ، سافرت الأولى إلى إيطاليا و تزوجت هناك ، و استمرت معى الثانية ، و ظل البحث عن الثالثة مستمراَ حتى وقت غير بعيد

كنت على ال Yahoo وخطر لى البحث عنها فقد كنت أعلم شغفها بالانترنت و تصفحه .... كتبت اسمها و انتظرت

..

...

.....

عاد لي بقائمة طويلة و لكن مجرد مجرد ما رأيت اسمها حتى خفق قلبي ليس لأنى وجدتها فحسب و لكن لأنى وجدتها كاتبة و محررة عظيمة و لها من المعجبين و المعجبات عدد ليس بالقليل ، و من قبل حتى أن أفتح الصفحة الخاصة بها وجدتني أبتسم بفخر هذه صديقتي .. و لكن .. كان لابد لي من التأكد

فتحت مدونتها على الانترنت و ظللت أنقب عن المعلومات و كلما وجدت إحداها أبتسم و أحدث نفسى هى ..اسمها ، دراستها ، اسلوبها ، قصصها ، عائلتها ، و أخيراً بريدها الالكترونى

هو ... إنه هو الذى كنت أملكه و عاتبت الأستاذ ياهوو على عدم تدقيقه فى البحث و لكنى عدت و سامحته مع فرحتى بها

أرسلت لها دون أن أخبرها بهويتى و سألتها وأجابتنى .. وجدتنى أطير من السعادة لأنها تذكرتنى و بت أخبر كل من حولى وجدتها وجدتها :) مع الاعتذار لأرشميدس و قد تذكرتنى ... بعد كل هذه السنوات تذكرتنى ،ثم أرسلت لى رقم تليفونها

تحادثنا طويلا و استعدنا الذكريات و اتفقنا على زيارتها فى منزلها

و اليوم ذهبت لزيارتها فى منزلها و رأيتها هى و ابنها ... يا الله ما أحلاه ، بارك الله لها فيه

ظللنا نتحدث لساعات و نتذكر كل ما مضى ، زملائنا ، مدرسينا ، دراستنا ، درجاتنا ، و لم نشعر بالوقت يمر بنا

تركتها و قلبى ينبض سعادة فمنذ وجدتها و هى قد فتحت لى باباً جديداً للحياة