الثوار فى ميدان التحرير وباقى الميادين فى معظم محافظات مصر معتصمين .. ولكل معتصم مطلب. في مطالب توافقيه لا يختلف عليها ثائر من حزب كنبه .. منها دم الشهداء ، واستقلال القضاء ، تطهير جهاز الشرطة ، حل المجالس المحلية، وقف المحاكمات العسكرية، تطهير الإعلام، ومحاكمة رموز الفساد من النظام السابق ... والحالى ! .. وفى مطالب فردية أو جماعية لكن غير توافقية. ذكائنا فى إننا نحدد أولوياتنا .. إننا نعرف نطلب ايه دلوقتى ونطلب ايه بعدين .. إننا نعرف بنطلب من مين ونعرف هو بيشوف مطالبنا دى ازاى، نعرف انهى مطالب هيا اللى هتحقق رضا قاعدة كبيرة من الشعب .. وتخليه راضى عن الثورة دى ومؤيدها .. بدل ما تخليه ناقم عليها وبيهاجمها... إننا نحط خطة وخطة بديلة .. خطوات تصاعديه للتصعيد .. وليست تلقائية .. لأن الخطوة اللى بناخدها بيبقى صعب نرجع فيها .. فلازم نفكر فيها كويس جدا.
وعلشان نكسب تعاطف وتأييد الأغلبيه الصامته دى لازم نشوف هما شايفين ايه.
ليه نسيب نفسنا 100 صوت يتكلم فى نفس واحد ويقول نفس الكلام ويرد على نفسه بنفس الردود ؟؟!!! .. لا احنا هنسمع بعض ولا حد هيسمعنا .. وفى الآخر اللى هيبان ويتصدر ل – غير الثائرين – هو مجرد دوشة على الفاضى .. دوشة غير مفهومة بتجيب صداع. طيب ليه ؟؟!!!!
ليه الحركات السياسة والأحزاب ميعدوش مع بعض - فى التحرير علناً قدام كل المعتصمين - و يختاروا منهم أو من غيرهم وبرأى الأغلبيه شخص عاقل رشيد .. يتكلم باسم مطالب الثورة ..... أليس من بينكم رجل رشيد ؟؟!!!!
الشخص دا هيكون مسئوليته يلف فى الميدان .. ويعد مع المعتصمين .. يشوف المطالب – اللى المفروض سكان زحل عارفينها أصلا – ويكون ملوش الحق لترشيح نفسه لا فى الانتخابات البرلمانية ولا الرئاسية ؛ وتكون الغالبية متوحدة وراه .. ونطلب مطلب مطلب ونصر ونلح ونرفس حتى فى الأرض لحد ما يتحقق، وبعدين ننقل على المطلب اللى بعده. صعبة دى ؟!
نمشى على التوالى وببطء وتتحقق مطالبنا - إن شاء الله - أحسن ما نمشى بالتوازى .. بالتوازى بنتشتت وهما بيتوهونا ويشغلونا بصغائر الأمور: مبارك قلبه وقف .. لا أصل مبارج حالته النفسية زفت .. ايه ده ؟! ده مبارك فى الغيبوبه – على اعتبار إنه كان فايق قبل كده .. مابقاله أكتر من 10 سنين فى الغيبوبة – و لا لا لا .. أصل مبارك فى السعودية أصلا ... لا ياشيخ ؟؟ فاضيين احنا نتشغل بمبارك وصبغة مبارك ومرات مبارك .. وابن عم بنت خال جوز مبارك !!!
أينعم صعب إننا نوحد دماغ أكتر من حد باتجاهات مختلفه على حاجه واحده ، بس لو كلنا عطشانين ، .كلنا بنجرى على الميه .. مبقولش اللى جنبى ده مش عاجبنى أو هيا الميه دى مغسولة ؟! .. ولا "هاتله قزازة بيره ساقعة من الفريجيدير ياقرنى" ... ميه يبقى هنشرب .. وهو عطشان وأنا عطشان ... كلنا عطشانين ... فى الحرم المكى كلنا بنبص للكعبه : زنجى / أصفر / أبيض / أحمر .. مبيهمناش .. وفى الكنيسة الكل بيسمع للقسيس .. غنى / فقير / متعلم / جاهل ... مبتفرقش ..وحده الهدف هى اللى بتجمعنا .. مش اتفاقنا فى الفكر، اللون، اللغه، ولا الثقافة.
لازم كل واحد يحاول يبطل يبص حواليه وبس .. نحاول نسمو شوية علشان نشوف الصورة مكتملة .. وعلشان مصر لازم كل واحد ييجى على نفسه شوية .. شويتين .. شويات .. علشان تبقى زى ما بنتمناها .. ساعتها بقى ممكن نلف حوالينا وناخد بالنا من إن الميه سخنه .. لأ أصلها مش ميه معدنية .. ولا لاتبقى المصيبة الكبرى وتطلع ميه مبلوله أساسا.
